2017-10-22[獨家]大台頒典禮延期下年舉行 合拍劇加入戰團

flora

2017-10-22[獨家]大台頒典禮延期下年舉行 合拍劇加入戰團...










《溏心3》今年都趕得切加入戰團。


每年去到年尾，又係派成績表嘅時間，大大小小嘅電視、電影或者樂壇頒獎禮相繼舉行，雖然認受性不及當年，不過對於有份參與嘅歌手或者演員嚟講，獎又點會嫌多呀？喺芸芸頒獎禮裡面，就算觀眾同網民點樣批評劇集嘅水準點樣下降，收視成績幾咁低，但係依然有唔少捧場客！

時間倒帶返到去97年，視帝視后頒獎當時只係喺《萬千星輝賀台慶》中以助慶形式出現，不過話晒嗰個年代百花齊放，劇集同演員質素都處於黃金時期，就算助慶反應當然都好好啦。去到06年，無綫決定將頒獎禮分拆成一個獨立節目《萬千星輝頒獎典禮》，不過近年小生花旦流失勁嚴重，收視成績每況愈下，連頒獎禮嘅成績都一年比一年差，舊年平均收視竟然只得27.6點，即係有約179萬觀眾捧場，成為歷史新低。(新聞連結：http://bit.ly/2it2kCr)
查實近年無綫喺劇集經常變陣，好似今年下半年播咗好多合拍劇，睇吓可唔可以招攬多啲資金同人才去救亡，喺其他方面亦都要變陣，呢個頒獎禮每年嘅12月中舉行，但係今年似乎有啲改動，據《蘋果》收到可靠消息，今年台慶頒獎禮將會順延到明年1月中舉行，正因為順延，所以連帶有份提名嘅劇集亦會相對地增加。
查實順延到明年1月中舉行嘅原因眾說紛紜，有指最主要係無綫之前人事大地震，珍姐曾勵珍以為自己一統天下，點知原來失勢，新任助理總經理杜之克插手入戲劇組，自組班底，搵咗多舊人回巢，好多仲要係當日離巢轉投港視嘅人，加上嘗試同大陸合作拍劇，好似宣萱、林文龍回巢拍嗰套《不懂撒嬌的女人》都有口碑。為咗頭炮再響啲，當然要繼續省靚招牌，最好方法就係用獎項證明。
往年頒獎禮嘅提名名單喺頒獎禮舉行前兩至三星期左右公佈，正常喺12月播嘅劇，一概被安排參加第二年嘅頒獎禮，搞到有唔少監製同演員都好討厭呢個「炮灰期」，換句話講，今年嗰四套台慶劇，《老表，畢業喇！》、《降魔的》、《誇世代》同《溏心風暴3》全部可以提名今年頒獎禮。而且四套入面，《老表，畢業喇！》同《溏心風暴3》都係合拍片。
被喻為無綫台慶頒獎禮前哨戰嘅《星和無綫電視大獎2017》，噚晚喺新加坡舉行，結果由王浩信同李佳芯成為視帝同視后獎項，究竟呢個賽果仲可唔可以視為台慶頒奬嘅得獎指標，咁就真係有所保留喇。  

http://hk.apple.nextmedia.com/enews/realtime/20171022/57360581

jvt

無記而家所以咪專搞網播咯……